En vista da boa canteira e de que os novos xogadores apuntaban calidades moi estimables, búscase a proxección do equipo cara a novas e máis ambiciosas situacións. Faise un novo campo de fútbol no lugar en que hoxe está a Praza Roxa ou como lle chamen, fedérase o club co nome de CLUB DEPORTIVO CARIÑO e pasa a xogar federado na Liga das Rías Altas, con equipos como Viveiro B, Burela, Ribadeo, Foz, etc.... Isto era no ano 1968. O primeiro partido celebrouse neste campo que mencionamos que tiña por nome Campo de Beiramar no que se lle gañaba a Burela por 2-1.

O Club participa cun equipo de afeccionados e outro de xuvenís o primeiro ano na Liga das Rías Altas e en seguintes datas na Liga da Ría de Ferrol ata a tempada 1971-1972, clasificándose polo medio da táboa; pero o equipo dos pequenos chegou a quedar subcampión na súa Liga. Dentro destes rapaces, entón xuvenís, destacaban xa os que máis tarde foron mi bos xogadores do equipo titular: Fernando de Maraña, rápido e valente, Toñito do Marao, bo e técnico, Amable, un rapaz con gran técnica, Suso de Feás, home importantísimo no medio campo que rematou os seus días deportivos coma xogador no Perlío.