O fútbol en Cacheiras ven de lonxe. Xa desde os anos 40 existía o campo da Cañoteira e o equipo de Cacheiras xogaba partidos de forma máis ou menos regular. Sen embargo, o paso de crear un clube deportivo federado non se deu até o ano 1977. A Sociedad Deportiva Cacheiras iniciaba a súa andaina na Terceira Rexional da tempada 77/78, nun grupo de 11 equipos. O éxito foi rotundo naquel debut, xa que o Cacheiras remataba campión con dúas xornadas de adianto, conquerindo o ascenso á entón fortísima Segunda Rexional, a coñecida como Liga do Sar, ademais de debutar na Copa do Sar eliminando ao potente Puebla e caendo co Padrón (hoxe Flavia). A afección naqueles comezos era numerosísima, enchendo campos alá onde xogara o equipo, e os máis veteranos aínda lembrarán a épica de partidos como os das eliminatorias de Copa ou os sempre polémicos derbis co Calo, tanto na liga coma no trofeo do concello.
O Cacheiras afiánzase no final dos 70 e inicios dos 80 coma un dos equipos máis fortes da Liga do Sar, aínda que pouco a pouco o nivel deportivo do equipo vai caendo e o equipo chega a descender nalgunha ocasión a Terceira, retornando á categoría superior rápidamente. Son anos nos que comeza o traballo de canteira, coa creación do equipo de xuvenís. A partires do ano 87 o Cacheiras volta a tomar pulo, da man do entrenador José Luis Iglesias, que trae con el a moitos xogadores procedentes da canteira do Vista Alegre santiagués. O equipo conquire o ascenso á Primeira Rexional no 88, e na tempada seguinte remata segundo, detrás do Noia, perdendo o ascenso nunha estrana eliminatoria co San Lázaro de Lugo. O seguinte ascenso chega no ano 90, tras rematar a liga en segundo lugar detrás, curiosamente, do histórico rival e veciño, o Calo, subindo os dous xuntos por primeira ocasión á Rexional Preferente. Nesta época tamén o equipo xuvenil conquire o ascenso a Liga Galega, todo un fito nas categorías inferiores do clube. O Cacheiras aguanta dúas tempadas en Preferente, pero descende no ano 92 e un ano máis tarde sofre a súa maior crise como clube, ao deixar a competición por unha tempada e ter que voltar a comezar desde a Terceira Rexional.
O Cacheiras vai collendo novamente azos perante os últimos anos do século, conquerindo retornar á Primeira Autonómica e, por riba de todo, convertíndose nun clube volcado no traballo de canteira, desde xuvenís até os máis pequenos. Desde o descenso a Segunda Autonómica do ano 2006, o clube mantense nos primeiros postos do seu grupo de Segunda, sempre a carón do desexado ascenso, coma na tempada 2009/10, na que un só gol na última eliminatoria da promoción, co Xallas de Santa Comba, o aparta do anhelado obxectivo. O equipo de xuvenís é un dos máis potentes da zona de Santiago nos últimos anos, gañando ligas e Copas do Sar, e nesta tempada se retomou o proxecto do equipo B, que compite con éxito en Terceira Autonómica, formado case ao completo por xogadores procedentes do equipo xuvenil da tempada anterior. Actualmente, o clube mantén, ademais dos 2 equipos de modestos, ao equipo de Primeira Autonómica Xuvenil, ao cadete, a 2 infantís, 2 de alevíns e outros 2 de benxamíns, ademais de outros 4 equipos de fútbol sala (1 de benxamíns, outro de prebenxamíns de segundo ano e 2 máis de prebenxamíns de primeiro ano).
Sociedade Deportiva Cacheiras | sdcacheiras@sdcacheiras.com
|